انا والشات

السلام عليكم ورحمه الله وبركاته >> اكثر اجر

وشلونكم عساكم بخير .. من مبطي وانا والله ودي اكتب موضوع !!
لكن العائق الوحيد لي ماودي احس اني ماصل واشوف موضوعي بالماصله

.. مشغلنا يقول ان واضح يحارب موهبته اكتابيه بالمنتديات !!
وراك عليه يا واضح ؟
المهمـ سالته قلت شلون ما اصير ماصل

قالي ابد مالك الا تقلدهمـ .. كيف ؟ قالي ابد خل موضوعك ملون وبين سطر والثاني اكتب (وش اسموه ) وحط هالوجهين بجنب بعض زي كذا ومايصير موضوعك ماصل !!
وتصير عضو ولايفي




>> جته افازيا تعبيريه

بصراحه عن نفسي مليت من المنتديات .. من سبع سنين وانا منتديات .. موضيع متكرره .. يعني بالعربي انا تشبعت منتديات .. استشرت رفيدزي المبحر بعالمـ النت ..
وش الدبره يابودحيمـ .. انا مليت من النت ؟

قالي وعيناه يكسوها الذهول .. احد يمل من النت ياقصيمي ؟؟
قلت له انا ياخي بديت احسس بتشبع !!

قالي وش جوك بالنت وش تدخل .. قلت له منتديات ومسن !!
المنتديات تشبعت .. والمسن ماعندي الا انت وجه ابن فهره هالي قدامي
قالي ياخي ابحر بالنت .. ادخل شات !! وحط لك نك وتغير من جو النت !!

مع اني كنت اول حياتي النتيه .. كنت راعي شات وجلست تقريباً ست سنين ..
بصراحه ما استفدت شي .. كنت صغير واذا سطحت مع بنت وعلمتها عمري سحبت علي
اذكر كان عمري وقتها 14 سنه .. كنت اكبر عمري ايقالي كبير واذا سالتن وحدهـ اقول 16 سنه خخخ

المهمـ مالكمـ بالطويله وقتها الشات كان اعمـارهمـ كبيرهـ .. ومافيه بزران زي هالوقت مع احترامي لـ اخواننا المبزره
كانت سواليف حلوهـ .. مافيه سب .. مافيه لعن .. مابوه سب اعراض

لكن الحسنه الوحيده الي استفدهـا من الشات .. تطورت بالاملاء .. وقتها كان عقدتي بالاملاء ..
بس ماحصل تشبيك ..

الي درجه مدرسي يقول عندك صعوبات تعلمـ .. وعندك خلل بالمخ تخلخلت عظامتوه

دخلت الشات من عمر 14 وتركته بعمـر الـ 20 .. كنت مدمن بصوره خياليه !!
حتى وقتها كان دايل اب .. الفواتير تصقع لـ 2000 ريال .. وقتها نهايه كل شهر اسحب السفير من ابوي لـ مده اسبوعين لـين يهدي الوضع وترجع الامور لـ طبيعتهـا .. وقتها نرجع السفير .. واتقهوي معهـ العصر !!

دخلت الشات بعد انقطاعـ .. الـ dsl انتشر بالسعوديه .. كلن بدا يدخل .. الي درجه الزلابه ابوعزيز داقن على امس يبي ايميلي ؟؟ >> تنفيذ لـ وصيت صديقي الماصل

الوضع تغير .. اكبر واحد عمره 21 .. سب وتلعين .. واعرااض .. وسالب وموجب .. الي درجه دخل على واحد قالي انت سالب والا موجب ؟؟! انا مادري وش السالفه قلت له سالب .. قالي ممكن تعرض لي بالكاام ؟؟
عالمن ضاايعهـ

وضع الشات تغير عن اول .. صارت بيئه الشات بيئه خصبهـ الشتايمـ .. والهياط .. والبحث عن اشياء غير شرعيه

قلت ياولد مابهاش .. ماصدقت اترك الشات ليه ارجع له ؟!

رفيدزي الماصل .. قالي ياخي ورا ماتكتب مواضيع وتغير جوك بالمنتديات .. من قارئ الي كاتب ؟
والله فكرهـ .. والحين انا قدامـ عيونكمـ ابحث عن ذاتي الكتابيه عبر منتداكمـ .. بس بلاش تحاربن ياواضح


بصراحه ماعندي موضوع .. لكن بوه (فيه ) اشيــاء اشوفه ورافعتن ضغطي مادري شلون تصير !!

من صغري ايامـ ماكانت بسن الطفوله .. كنت اميل لـ مجلس الحريمـ اكثر من الرجال !!
لاني بصراحه احس ان سواليف الحريمـ الاقرب لـ عقليتي الطفوليه !!

كنت ملاحظ وقتها المجلس فيه عشر حريمـ .. تقريبا كلهن بنفس اللحظه وبنفس الوقت يسولفن جميع .. ماتدري من الي الي تسولف ومن الي تسمعـ !!

بعدين بديت ألحظ هالشي لما اروح لم مجمع تجاري .. حديقه .. شاطي .. اشوف هالشي مادري وش المغزى من هالسالفه ؟! سالت اكثر من واحد اكد لي هالشي يعني هالشي مهوب محصور بمجتمعي الوهابي المنغلق
على طـاري هالحريمـ .. ياخي وش ماتسوي بهن .. توديهن وتجيبهن .. لما مره تنشغل وتقولهن والله اني ياميمتي والا ياوخيتي اني منشغل .. الرد طبعاً يكون بالطريقه ... اييه اصلا ما عمرك نفعت من مته وانت نافعن ماغير تسعسع بهالشوارع وخيرك لـ غيرك >> والا يالبنان ؟
سالت اخوياي عندهمـ نفس الشي .. تقول ما اقدر مره .. تصير كخ وماعمرك نفعت

ياجماعه احس اني مشتت المشكله اني قبل شوي مغير اللوك وشايلن شنبي يابوصفوق خخخ

..

دخلت واخذت فره بالجاده وعشت به وقت مهوب بسيط .. ياخي حسيت الي اقراه عن مشاكل المجتمع تصير بمجتمع ثاني !!
مبالغه بصوره رهيبه .. لو يدخل شخص مهوب سعودي يبي يحس اننا نركب حمير وانتمـ بكرامه
صحيح فيه اشيـاء غلط .. لكن مهوب بهالتضخيمـ والبكـاء على حال مجتمعنا المسكين المنكسر الصايع والضايع بعيونهمـ !!.. منب صادز ياعيال ؟ والا اتسذب يابنات ؟ (الله من الطماله)
تدرون وش النكته ؟ السعوديه بالمرتبه الثالثه من ناحيه الدرجات العلميه بالعرب !!
تدرون وش النكته الثانيه .. السعوديين من اسعد العرب وهالشي نشوفه بعيوننا وين مانروح نشوف الناس مبسووطه .. الا خالي يعمر عماره المسكين وصلخ جلده الحديد
ولد جيراننا ضايقن صدره السفاره الكنديه عيو يعطونه تإشيره وضايقن صدره المسكين
وصديقت خويي الي بالمسن ضايقن صدره وده تعيش قصه حب مع واحد وسيم ورومنسي ولد عز وطويل ومثقف وشاعر .. والخ

كان من ضمن افكاري ودي احاتسيكمـ عن خويي المغزلجي وحياه الضياع الي يعيشه لكن بسبب ضيق الوقت وشبح واضح الي يطاردني ماحبيت اقصه لكمـ

وكان ودي احاتسيكمـ عن صديقي ايام حياه الرياض الي توفي ابوه ورث ملايين وتغير علينا لكن يبي له موضوع كامل يا واضح

>> وش اسموه مهوب سامج هالوجه ؟

تصبحون على خير
تحياتي لكم مملوح

والله شكلك عايش بـمـعـانات
لا يعلم بها ألا الله
..

والناس كلها ما هي مبسوطه
..

تدري ليش ؟

لأن هالمعاصي ذابحتهم
..

يدورون السعادهـ في عصيان الله
..

وما يدرون أن السعادهـ عند الله
..

المووهم : يعطيك ربي العافيه
عـلـى تعبكـ، بالموضوع
..
وتقبل ودّي قبل ردّي
..

^_^